Ramene Nonton Piala Dunia

Ditulis Aring: Ahmad Naufa
Sedilut maning gak ana piala dunia nang tivi. Biasane nek piala dunia wis dimulai, wong-wong pada gerombolan nonton bareng. Ana sing merga pancen seneng nek nonton balbalan bareng-bareng, tur ana sing arep luru bala gawe totoan. Pokoe rame banget angger ana pertandingan, apa maning sing tanding tim pada kuate. Istilah inggrise big match, walayuh, sing pada njegoni karo totoan akeh banget.

Wong-wong nggon nyong sing pada totoan akeh-akehe bocah enom, tapi wong tuane ya akeh sing pada milu-milu. Totoan biasane ana loro, nek ora duit ya rokok. Nek sing wonge rada apik agamane ya ora gelem totoan, pol-pole sing gawe taruan pijetan. Mbuh nek ana sing totoan minum apa liyane nyong orang ngerti. Sing jelas nang ndesane nyong paling akeh ya loro kuwe, nek ora duit ya rokok pirang bungkus apa pirang slop.

Nek mbiyen, aring nonton luru nggon wong sing ndue tivi. Maklum, kala semana hurung akeh tivi, sedesa wae sing ndue mung agi pira. Nyong wae mbiyen nek gak nonton tivi kudu mlaku seka njangkrian tekan pungangan ka. Mung ugur arep nonton Wiro Sableng apa Baja Hitam RX angger dina minggu. Kue wae angger tekan nggone umahe igin ditutup. Ana seket-an cah cilik sepadanye nyong mboan, pada nunggu nggon umahe pak manten. Pokoke rasane nelangsa, tapi ya tetep seneng. Bar kuwe, nyong ora tau beli nang ngumah, anjuk bapak nukokke tivi dewek.

Nyong ndue tivi termasuk awitan ning ndesa. Parabola maning tivine, ora ugur antena biasa. Dhedi, nek pas disetel, weleyuh, akeh banget sing nonton. Ramene kaya pasar. Apa maning mbiyen angger pada rebutan nonton acara dewek-dewek. Nek mbah kakung senenge nonton tinju. Nek mbah putri senenge nonton berita. Nek wong-wong senenge nonton Angling Dharma sing gelut-gelut. Nek nyong senenge nonton kartun. Kadang pada ribut dewek-dewek. Ning nek pas piala dunia ora jah, kabeh pingine pada nonton bal-balan.

Bal Ndadekke Bersatu
Kasil seka nonton bal nek bareng-bareng akeh sing bisa dirasakke. Salah sijine pemuda-pemudane anjuk dhedi bersatu. Nek digalakke terus bisa apik ngge kemajuan desa, apa maning kiye bar pemilu sing suasanane egen panas. Malah-malah tanggal songo juli sasi ngesuk ya gak ana pilihan presiden. Nek nonton bareng digalakke kayane ndhedekke suasana sing panas dhedi adem. Sing maune mrengut dedi cekakaan. Sing maune lara ati merga kalah, dhedi kelalen merga surak-surak bareng.

Nonton bareng, jane bisa digawe sing luwih meriah timbang sak hurung-hurunge. Nyong nduwe angen-angen, nek nontone ning lapangan nganngo proyektor anjuk di sound sistem sing gede, dinei lampu sing padang, ketone wong-wong gelem pada ndelok. Ben tambah rame, dianakke hadiah seka sponsor apa jalukke lurahe. Nek wong-wong pada ndhelok kan anjuk rame banget acarane. Nek rame nggko ana bakul-bakul pada dodol, seka cilok, salome, tekan lotek. Nek sing dodol akeh, puteran duite dadi cepet tur akeh, desane dhedi maju. Kira-kira kaya kono angen-angene nyong. Muga-muga ana sing gelem nggerakke!

Purworejo, 31 Mei 2014

Iklan

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s

Atas ↑

%d blogger menyukai ini: