Nyong saiki sadar, mending di anggep elek aring wong, daripada dianggap apik. Nek di anggep elek, nyong anjuk ngoreksi pancen bener apa ora nek nyong ke kelakuane egen elek. Ding nek di anggep apik, malah bisa marai gumede, sombong lan sak piturute: sifat-sifat sing ora apik. Medeni banget.

Kaya wingi, nyong sempet meh stress, gara-gara malem tanggal siji Suro (muharram) ngisuk kon ngisi pengajian. Takmir mejide langsung sms: mas, saget ngisi pengaosan wonten taun enggal mbinjing mboten?

Sms kui ora langsung tak bales. Nyong mikir sui banget. Nyong ngrasa nyong ke hurung pantes nek ngomongi wong. Nyong sadar pancen sethithik-sethithik nyong ngerti agama, merga wis tau turu ning pondok. Ding nek kon ngisi pengajian, ka rasane egen pol abote, merga hurung bisa ngomongi awake dewek.

Contone: nyong kadang nglanggar perintah-perintahe Gusti Allah, kadang sholate telat lah, kadang maksiat lah, lan sak werna-wernane. Nek nyong anjuk ngomongi wong liya, kan kuwe jenenge munafik: ngomongi awake dewek bener wae hurung bisa, ka malah ngomongi wong liya.

Nyong dedi sedih. Sms-e agak tak bales prige orang ngerti. Nek ngomong wektune ora sela ka ngapusi, padahal nyong sela. Ning nek tak bales bisa, njuk nyong isin karo awake dewek lan isin karo Gusti Allah.

Sms kue tak nengke nganti rong dina. Nyong anjuk mikir-mikir maning. Pokoke tak pikir-pikir kabeh apik eleke.

Akhire tak bales: njih, Insya Allah saget, Pak.

Ning, kana, takmir mejide ora mbales mening. Nyong dedi ora penak: apa wis ulih ganti apa kepiye?

Nyong mbalesi sanggup ngisi merga sak elek-eleke nyong tetep kudu nyampekke apa sing teka seka nabi. Nyong ning pengajian sisuk rencanane ya ming nyampekke apa-apa sing wis di dawuhi Kanjeng Nabi, sing dilakoni nabi, karo apa-apa sing hubungan karo sejarah taun hijriyyah.

Nyong orak akon wong-wong kon dadi apik. Nyong ming arep ngomong apa-apa siang apik seka Kanjeng Nabi, njuk apa-apa sing seka nabi. Mung ngono kui tok.

Mugo-mugo pihak takmir pancen wis ulih ganti, dedine udu nyong sing ngaji.

Pancen abot dianggap wong apik aring wong. Rekasa. Mending dianggap elek malah beres. Nek di glendengi ya luweh, malah ngurangi dosane dewek. Beres, ora dedi beban!

 

Purworejo, 29 september 2016